Héraðssaksóknari hefur ákært Steinþór Einarsson fyrir að hafa orðið Tómasi Waagfjörð að bana í íbúð á Ólafsvegi á Ólafsfirði aðfaranótt 3. október árið 2022. Ákæran hljóðar upp á manndráp.

Í ákæru segir að Steinþór hafi stungið Tómas tvisvar með hnífi í vinstri síðu með þeim afleiðingum að ytri mjaðmarslagæð fór í sundur og olli umfangsmiklu blóðtapi sem leiddi til dauða Tómasar.

Málið verður þingfest fyrir Héraðsdómi Norðurlands eystra þann 26. september næstkomandi. Samkvæmt heimildum DV mun Steinþór neita sök og bera við sjálfsvörn. Í gæsluvarðhaldsúrskurði sem birtur var nokkrum vikum eftir atburðinn segir að gögn málsins beri með sér að hinn látni hafi átt upptökin að átökunum og veist að hinum grunaða með hnífi og stungið hann í andlit og læri. Staðfest er að Steinþór var með alvarlega hnífstunguáverka eftir átökin, meðal annars í andliti. Jafnframt er vitað að íbúðin var sem blóðvöllur. Tómas fór ævareiður til fundar við Steinþór þessa nótt en tvær konur og einn karlmaður voru einnig í íbúðinni. Þau sluppu ómeidd.

Héraðssaksóknari krefst þess að Steinþór verði dæmdur til refsingar og greiðslu alls sakarkostnaðar.

Gerðar eru kröfur um miskabætur og skaðabætur (vegna missis framfærslu) fyrir hönd tveggja barna Tómasar, annað er fætt árið 2018 og hitt 2015. Miskabótakröfur fyrir hvort barn nema 6 milljónum króna og skaðabótakröfur 6,5 milljónum fyrir yngra barnið og um 4,5 milljónir króna fyrir eldra barnið.