Nemandi við Oslóarháskóla sem réðst á Ingunni Björnsdóttur, dósent, og samstarfsmann hennar með hníf á dögunum hefur verið úrskurðaður í áframhaldandi fjögurra vikna gæsluvarðhald. Nettavisen greinir frá.

Árásin átti sér stað þann 24. ágúst síðastliðinn en árásarmaðurinn sat þá fund með Ingunni og áðurnefndum kollega hennar. Hafa norskir fjölmiðlar áður velt því upp að tilefni fundarins hafi verið það að nemandinn hafi fallið á prófi.

Sjá einnig: Nemandi réðst með hníf að Ingunni og kollega hennar í háskólanum í Osló

Eftir að fundurinn hafi staðið yfir í drjúga stund dró nemandinn upp hníf og réðst maðurinn á Ingunni og kollega hennar. Ingunn slasaðist alvarlega í árásinni og hlaut að minnsta kosti sextán stungusár. Kraftaverk má telja að hún hafi lifað árásina af en hún hefur nú verið útskrifuð af spítalanum og dvelur nú á Íslandi. Kollegi hennar, sem einnig særðist í árásinni, hlaut minniháttar áverka og var útskrifuð samdægurs af spítala.

Árásarmaðurinn, sem er á þrítugsaldri,  hefur verið kærður fyrir tilraun til manndráps og ásetning um að valda stórfelldu líkamstjóni. Fram kemur að árásarmaðurinn hefur ekki komið áður við sögu lögreglu en hann neitar sök varðandi manndrápstilraunina en hefur játað sök varðandi tilraunina til líkamstjóns.

Árásin hefur vakið mikinn óhug og umtal í Noregi og má leiða líkum að því að til aðgerða verði gripið til að tryggja öryggi starfsfólks háskóla í landinu, eitthvað sem ekki hefur verið mikil þörf á hingað til. Kemur fram í áðurnefndri frétt að hafin sé rannsókn á ofbeldi og hótunum sem starfsmenn háskóla í Noregi hafi mátt þola undanfarin ár.