Lögreglan á Norðurlandi eystra hefur ákært mann fyrir að flytja byssur undir áhrifum áfengis. Telst það vera vopnalagabrot að mati lögreglunnar.

Maðurinn sem er 35 ára gamall er sakaður um að hafa aðfaranótt laugardagsins 3. júlí árið 2021 verið undir áhrifum áfengis á heimili sínu að Reynivöllum 6 á Akureyri þegar hann var að flytja skotvopn og skotfæri.

Þetta hafi hann gert án þess að tryggja viðeigandi og áskilda geymslu skotvopna og skotfæra í aðskildum og læstum hirslum þar sem óviðkomandi nær ekki til þeirra. Skotvopnin og skotfærin geymdi hann í töskum undir rúminu sínu.

Telst þetta brot á tveimur greinum vopnalaga. Annars vegar þeim sem banna meðferð skotvopna undir áhrifum áfengis eða vímuefna og þeim sem kveða á um geymslu þeirra. Viðurlög við brot á vopnalögum geta verið sektir og fangelsi allt að 4 árum eða 6 árum ef brotin eru stórfelld.

Býr á óþekktum stað í Danmörku

Lögreglan krefst þess að maðurinn verði dæmdur til refsingar og greiðslu alls sakarkostnaðar. Hann er hins vegar skráður ótilgreint til heimilis í Danmörku. Er hann því kvaddur til að koma fyrir dóm, hlýða á ákæru og halda uppi vörnum þegar málið verður dómtekið þann 25. október.

„Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður á málið að honum fjarstöddum,“ segir í fyrirkalli málsins.