Lögreglan á Norðurlandi eystra greinir frá því á Facebook síðu sinni að nú í morgun hafi fallið tvær aurskriður á veginn um Dalsmynni, Fnjóskadalsveg eystri, og sé hann lokaður frá gatnamótunum við Grenivíkurveg í norðri og við Þverá í suðri og verði svo, a.m.k til fyrramáls en þá verði staðan endurmetin. Myndin sem lögreglan birtir með færslunni var tekin nú í morgun við aðra skriðuna.

Koma skriðurnar í kjölfar mikillar úrkomu og vinds sem gengið hefur yfir umdæmið síðasta sólarhring.

Í færslunni eru einnig íbúar á Siglufirði hvattir til að vera ekki að óþörfu í nálægð við hús sem þakið rifnaði af í gærkvöldi. Það séu enn lausamunir að fjúka til og frá.