Baráttukonurnar Edda Falak og Valgerður Árnadóttir, talskona Hvalavina, velta því báðar upp hvort að aðgerðir lögreglu gagnvart mótmælandanum Anahita Babaei hafi verið með rasískum undirtón. Mótmælastöðu Anahitu og kollega hennar, El­issu Bijou, lauk fyrir stundu og má telja að skortur Anahitu á vatni og vistum hafi hraðað þeirri ákvörðun. Lögregla gerði bakpoka hennar upptækan fljótlega eftir að mótmælin hófust í fyrrinótt og því var hún án þessara nauðþurfta í um 30 klukkustundir áður en yfir lauk.

Edda, sem mætti á vettvang mótmælanna fyrr í dag, birti færslu á Instagram-síðu siunni þar sem hún veltir upp þeirri spurningu hvort að lögreglan hefði tekið af henni vistirnar ef að um íslenskan mótmælanda væri að ræða. Þá benti Edda á að Anahita, sem er frá Íran, hefði óskað eftir vatni og læknisaðstoð á meðan mótmælunum stóð en þeirri beiðni hafi ekki verið sinnt. „Ég velti því fyrir mér hvort við séum á sömu vegferð og Íran, þar sem fólk er drepið fyrir að mótmæla?” spurði Edda á Instagram-síðu sinni.

Valgerður tók í svipaðan streng á Facebook-síðu sinni. „Anahita er frá Íran þar sem hún á að hættu að vera drepin sýni hún borgaralega óhlýðni, við héldum að það væri öðruvísi hér og að mannréttindi væru virt á Íslandi! Er það vegna þess að hún er brún kona frá öðru landi að hún fær ekki lífsnauðsynlega aðstoð? Ég myndi skipta við hana ef ég gæti, sjá hvort lögregluyfirvöld kæmu öðruvísi fram við mig!? Hver ber ábyrgð á þeirri ákvörðun að taka af henni VATN og neita að gefa henni það aftur?,“ spurði Valgerður á meðan mótmælin voru enn yfirstandandi.

Í viðtali við Vísi skömmu eftir að Elissa og Anahita höfðu stigið niður úr möstrunum þá gagnrýndi Valgerður framgöngu lögreglu og þá sérstaklega að Anahita hefði verið flutt á brott úr lögreglubíl en ekki sjúkrabíl.

Ásgeir Þór Ásgeirsson, yf­ir­lög­regluþjónn hjá lög­regl­unni á höfuðborg­ar­svæðinu, sagði í viðtali við fréttastofu Vísis að ef konurnar hefðu verið í slæmu ástandi hefðu þær verið fluttar á sjúkrahús. Svo hafi ekki verið og þær því flutt fluttar á lögreglustöðina á Hverfisgötu þar sem þær hafi verið skoðaðar af sjúkraflutningamönnum.

Aðspurður um hví bakpoki Anahitu hefði verið gerður upptækur kom hann með þá myndlíkingu að enginn myndi kvarta yfir því ef að vatn og vistir innbrotsþjófs í íbúð yrðu gerðar upptækar en greint hefur verið frá því að Hvalur hf. hafi kært konurnar fyrir húsbrot.

Þá sagði hann þær Elissu og Anahitu hafa verið samstarfsfúsar allan tímann og að samskipti þeirra og lögreglu hafi verið mjög kurteisisleg.

Færsla Valgerðar