Ingunn Björnsdóttur, íslenskur dósebt við Háskólann í Osló, varð fyrir árás hnífamanns í skólanum í gær  en árásin vakti mikinn óhug í Noregi. NRK  greindi fyrst frá árásinni en í frétt miðilsins kom fram að árásin hefði átt sér stað í lyfjafræðideild háskólans. Tveir kennarar særðust í árásinni, Ingunn  og kollegi hennar, sem bæði voru kennarar hins grunaða og þekktu því til hans.

Ingunn birti mynd af sér á sjúkrabeði í færslu á Facebook sem hún gaf DV góðfúslegt leyfi til að birta.

Tveir hnífar fundust á vettvangi árásarinnar en árásarmaðurinn var í kjölfarið yfirbugaður af nærstöddum nemendum og starfsfólki skólans sem varð vitni að árásinni. Hann var orðinn rólegur þegar lögreglu bar að garði og handtók hann.

Í umfjöllun NRK kom fram að annar prófessoranna hafði farið verr út úr árásinni og væri alvarlega slasaður á gjörgæslu. Í stuttum skilaboðum til DV segir Ingunn að hún hafi verið sú sem slasaðist meira í árásinni. Hún sé þó ekki í lífshættu og sé vongóð um að ná fullum bata. Á líkama hennar séu þó sextán ör eftir árásina.

Rektor háskólans sagði í frétt NRK að árásin væri sorgleg og litin alvarlegum augum. Sagði hann að nemendum og starfsfólki skólans hafi þegar verið boðin áfallahjálp vegna málsins.