Í kjölfar innrásar Rússa í Úkraínu sóttu Finnland og Svíþjóð um aðild að NATO. Finnar eru nú þegar orðnir aðilar og Svíar fá aðild á næstu vikum, aðeins er beðið eftir samþykki tyrkneska þingsins.

Með inngöngu ríkjanna eru öll Norðurlöndin orðin aðilar að bandalaginu. Finnland og Svíþjóð fá nú sæti í stjórnstöð NATO í Norfolk í Bandaríkjunum en eftir því sem norska dagblaðið Klassekampen segir þá hafa Norðurlöndin fimm lagt til að komið verði upp nýrri stjórnstöð í Norður-Evrópu.

Eirik Kristoffersen, yfirmaður norska hersins, sagði að Norðmenn líti þar til Bodø. Hann sagði að með því að staðsetja stjórnstöð á Norðurlöndunum sé hægt að vinna með þær sérstöku hernaðarlegu áskoranir sem eru á Norðurlöndunum.

Hann sagði að það sé ekki ósk Norðurlandanna að ráðist verði í uppbyggingu nýrra innviða, það eigi að nota þá sem eru til staðar. Í Bodø sé flott og mjög vel starfhæf herstöð.

Herstöðin er höfuðstöðvar norska hersins.

NATO er nú þegar með stjórnstöðvar í Hollandi og á Ítalíu.