Eins og DV greindi nýlega frá varð talsvert uppnám þegar samskipti tveggja starfsmanna Mannréttinda- og lýðræðisskrifstofu Reykjavíkurborgar, sem var ætlað að vera íbúaráði Laugardals til halds og trausts á fundi ráðsins í síðastliðnum mánuði, urðu opinber vegna tæknilegra mistaka annars þeirra. Af samskiptunum mátti ráða að starfsmennirnir voru að leggja sig fram við að koma í veg fyrir umræðu á fundinum um stöðu leikskólamála í hverfinu.
Olli málið uppnámi meðal íbúa í hverfinu og borgarfulltrúa. Heyra mátti þau sjónarmið að íbúaráð væru augljóslega tilgangslaus en meirihluti borgarstjórnar vildi ekki taka undir það og sagði ráðin hafa mikilvægu hlutverki að gegna. Á næsta fundi íbúaráðsins var Anna Kristinsdóttir mannréttindastjóri Reykjavíkurborgar, yfirmaður Mannréttinda- og lýðræðisskrifstofunnar, viðstödd. Hún baðst afsökunar á hegðun starfsmannanna tveggja og sagði það ekki hlutverk starfsfólks skrifstofunnar að stjórna á nokkurn hátt umræðum á fundum ráða og nefnda sem því er ætlað að veita aðstoð. Sagði Anna að mál starfsmannanna væri í hefðbundnu ferli innan skrifstofunnar.
Á fundi borgarráðs í gær lögðu fulltrúar Sjálfstæðisflokksins fram tillögu um að Innri endurskoðun borgarinnar kanni tildrög þess að fulltrúar í íbúaráði Laugardals hafi fengið rangar og villandi upplýsingar um verksvið og heimildir ráðsins frá starfsmönnunum. Af samtali þeirra sé ljóst að umræddum starfsmönnum skorti réttan skilning á starfi sínu og samþykktum íbúaráða í Reykjavíkurborg. Þar af leiðandi hafi íbúaráðið ekki getað sinnt hlutverki sínu með réttum hætti.
Segir í tillögunni að ætla megi að ekki sé um að ræða einangrað tilvik enda ólíklegt að starfsmennirnir hafi ætlað viljandi að villa um fyrir þessu tiltekna íbúaráði. Líklegt sé að þessir tilteknu starfsmenn hafi ekki verið þjálfaðir með fullnægjandi hætti eða að atvikið endurspegli skilning Mannréttinda- og lýðræðisskrifstofunnar á samþykktum íbúaráðanna eða viðteknar venjur innan skrifstofunnar sem kunni að vera ómeðvitaðar eða meðvitaðar.
Stjórnsýsla Reykjavíkurborgar grundvallist á því að nefndir og ráð innan hennar starfi eins og þeim er ætlað að gera. Ef grunur leiki á að starfsfólk og kjörnir fulltrúar leggi mjög mismundandi skilning í verksvið og heimildir nefnda og ráða kalli það á yfirferð þessara mála og þá ekki síst til að koma í veg fyrir sóun á tíma og fjármunum.
Áheyrnarfulltrúi Flokks fólksins í borgarráði, Kolbrún Áslaugar Baldursdóttir, tók í bókun sinni undir tillöguna. Hún segist feginn því að upp hafi komist hvernig í pottinn er búið undir niðri og eygir von um að róttæk jarðvegsskipti eigi sér stað en atburðurinn eigi sér einhverjar rætur. Stjórnendur séu ábyrgir þótt hver og einn einstaklingur sé ábyrgur fyrir eigin framkomu.
Í bókun fulltrúa meirihlutaflokkanna, Samfylkingarinnar, Framsóknarflokksins, Pírata og Viðreisnar í borgarráði segir að Innri endurskoðun hafi m.a. það verkefni að taka við ábendingum um ámælisverða háttsemi frá starfsmönnum og borgarbúum. Verkefnaval og forgangsröðun verkefna byggi á áætlun hverju sinni ásamt því að innri endurskoðandi hafi heimild til að setja mál á sína dagskrá að eigin frumkvæði. Innri endurskoðun hafi tekið þetta tiltekna atvik til skoðunar og telji ekki ástæðu til að hefja sérstaka könnun og rannsókn á því.
Var tillögunni í kjölfarið vísað frá með fjórum atkvæðum fulltrúa meirihlutaflokkanna gegn þremur atkvæðum fulltrúa Sjálfstæðisflokksins og Sósíalistaflokksins.
