Vettvangsrannsókn lögreglu og Rannsóknarnefndar samgönguslysa (RNSA) í tengslum við flugslys á sunnudag þar sem þrír létust, hófst í kjölfar þess að vélin fannst eftir tveggja stunda leit úr lofti og á láði. Rannsókn stóð yfir það kvöld og fram til morguns. Hún hélt svo áfram í gær seinnipartinn.

Sjá einnig: Flugslysið á Austurlandi – Hin látnu öll íslensk

Vettvangsrannsókn telst nú lokið, eins og segir í tilkynningu frá lögreglunni á Austurlandi. 

Flugvélin var því í gærkvöldi flutt af slysstað með aðstoð þyrlu Landhelgisgæslu og síðan landleiðina í húsakynni RNSA á höfuðborgarsvæðinu. Úrvinnsla gagna og öflun heldur áfram og mun sú vinna mun taka nokkurn tíma. Ekki er vitað um orsakir slyssins.

Samkvæmt heimildum DV var um vinnuferð að ræða vegna hreindýratalningar, sem fer fram ár hvert í júlímánuði, en auk flugmanns voru tveir vísindamenn um borð í vélinni.

Minningarstund sem verður í Egilsstaðakirkju í dag klukkan 18. Eru þeir sem eiga um sárt að binda vegna þessa hörmulega slyss hvattir til að leita sér áfallarhjálpar sem í boði er. 

Sjá einnig: Minningarstund í Egilsstaðakirkju vegna flugslyssins