Í gær tilkynnti Persónuvernd að stofnunin hefði sektað Landlæknisembættið um 12 milljónir króna vegna öryggisbrests á vefsvæðinu Heilsuvera og fyrir að veita villandi upplýsingar við rannsókn málsins.
Sektin var sú hæsta sem Persónuvernd haf’i lagt á í sögu sinni. Metið stóð hins vegar ekki lengi því fyrr í dag tilkynnti Persónuvernd um mun hærri sekt en þá sem var lögð á Landlæknisembættið.
Í tilkynningu á vef Persónuverndar segir að stofnunin hafi 27. júní lokið málum vegna skráningar upplýsinga frá eCommerce 2020 ApS um vanskil á svonefndum smálánum hjá fjárhagsupplýsingastofunni Creditinfo Lánstrausti hf.
Neytendasamtökin höfðu kvartað yfir stofunni árið 2020 með vísan til lántökukostnaðar og reyndi á hvort, í ljósi úrlausna þar til bærra aðila um ólögmæti þessa kostnaðar, skráningin hefði brotið gegn lögmætisskilyrði persónuverndarlöggjafarinnar.
Persónuvernd segir að í kjölfar úrlausna frá dómstólum hafi ekki lengur reynt á þetta atriði sérstaklega, en við athugun á lánaskilmálum eCommerce 2020 ApS á síðari stigum hafi komið í ljós að þar til seint í maí 2019 hafi vantað ákvæði í lánaskilmála um að við nánar tilgreind vanskil kæmi til vanskilaskráningar.
Í tilkynningunni kemur fram að niðurstaðan sé sú að fjárhagsupplýsingastofunni bæri að kanna hvort kröfur, sem henni væru sendar til skráningar, fullnægðu skráningarskilyrðum. Jafnframt taldi Persónuvernd að hvað umræddar kröfur snerti hefði Creditinfo Lánstraust hf. ekki farið nægilega að þeirri skyldu og var af því tilefni lögð sekt á fjárhagsupplýsingastofuna.
Við ákvörðun um fjárhæð sektarinnar var litið til fjölda hinna skráðu, þess að vinnslan tengdist kjarnastarfsemi stofunnar, þess að starfsemi stofunnar var ætlað að skila hagnaði, tafar á eyðingu skráninga eftir að misbrestur á skráningarskilyrðum kom í ljós, svo og hins sérlega íþyngjandi eðlis vinnslunnar, m.a. í tengslum við möguleika hinna skráðu á lánafyrirgreiðslu vegna íbúðakaupa eða ófyrirséðra útgjalda.
Einnig var vísað til þess að skoðun, sem stofan gerði á umræddum skráningum, fór ekki fram fyrr en að fengnum ábendingum utanaðkomandi, en jafnframt var þó tekið tillit til þess að með skoðuninni var brugðist við ábendingunum af sjálfsdáðum þannig að skráningum var að endingu eytt.
Með vísan til alls þessa var Creditinfo Lánstraust hf. sektað um 37.856.900 krónur, 2,5 prósent af ársveltu fyrirtækisins.
Þetta er langhæsta sekt sem Persónuvernd hefur nokkurn tímann lagt á.
Þá voru fyrirtækin eCommerce 2020 ApS og fyrrum innheimtuaðili þess félags, A.I.C. ehf. (áður Almenna innheimtu ehf.) einnig sektuð fyrir sendingu krafnanna til skráningar þrátt fyrir að áðurnefnt ákvæði í lánaskilmálum skorti. Sektin var lækkuð þar sem umsvif fyrirtækjanna hafa dregist saman en hið fyrrnefnda fékk 7, 5 milljóna króna sekt en hið síðarnefnda var sektað um 3,5 milljónir.
