Hinrik Ingi Óskarsson, fyrrverandi keppandi í Crossfit og einkaþjálfari, var þann 13. júní síðastliðinn sakfelldur fyrir Héraðsdómi Reykjaness fyrir margvísleg brot, m.a. eignaspjöll og líkamsárás.
Málið var rekið gegn Hinrik Inga og félaga hans Lárusi Guðmundssyni. Í fyrsta lið ákæru eru báðir ákærðir fyrir fjárkúgun og vopnalagabrot í félagi með því að hafa í október árið 2021 veist að mönnum inni á skrifstofu fyrirtækis í Kópavogi, í því skyni að hafa af þeim fjármuni, dregið fram hníf og sýnt þeim og hótað að drepa þá og fjölskyldur þeirra og brenna húsnæði fyrirtækisins. Fengu þeir mennina til að leggja 200 þúsund krónur inn á reikning Lárusar.
Hinrik Ingi var að auki ákærður fyrir eignaspjöll og umferðarlagabrot, sem og fyrir líkamsárás á skemmtistaðnum Auto í Lækjargötu, í mars árið 2022, en þá veittist hann að manni með ofbeldi, skallaði hann og sló ítrekað í andlitið, m.a. með þeim afleiðingum að brotaþolinn nefbrotnaði.
Við fyrirtöku málsins féll ákæruvaldið frá ákæru um vopnalagabrot.
Hinrik Ingi er margdæmdur maður og hefur meðal annars verið sakfelldur fyrir ofbeldisbrot og frelsissviptinum.
Bæði Hinrik Ingi og Lárus játuðu brot sín skýlaust fyrir dómi. Fram kemur í dómnum að Hinrik Ingi hafi snúið við blaðinu og fært líf sitt til betri vegar.
Hinrik Ingi var dæmdur í tveggja ára skilorðsbundið fangelsi. Lárus Guðmundsson var dæmdur í sex mánaða skilorðsbundið fangelsi.
Dóminn má lesa hér.
