Yfirheyrslur yfir manni sem grunaður er um að hafa orðið meðleigjanda sínum að bana á laugardagsmorguninn hafa gengið vel. Í samtali við DV vildi Grímur Grímsson, yfirlögregluþjónn á miðlægri rannsóknardeild Lögreglunnar á höfuðborgarsvæðinu, ekki upplýsa um hvort maðurinn hafi játað verknaðinn, en hann segir að yfirheyrslurnar hafi gefið góða mynd af atburðarásinni.

„Ég vil ekki fara út í hvað kemur fram í yfirheyrslum en yfirheyrslur hafa gengið vel en þær fór mest fram á laugardaginn. Eftir helgina teljum við að við séum komin með nokkuð góða mynd af atburðarásinni.“

Bæði hinn látni og hinn grunaði eru Pólverjar, hinn látni var um fertugt og hinn grunaði nokkuð á fimmtudagsaldri. Talið er að hinn látni hafi látist af stungusárum. Tveir menn voru upphafilega handteknir vegna málsins á laugardag en annar mannanna hefur verið látinn laus. Aðspurður hvort hann væri ekki lengur grunaður um aðild að málinu segir Grímur: „Við viljum ekki útiloka neitt en við teljum núna að hans aðild sé engin, þ.e. á þessum tímapunkti er hann ekki talinn tengjast málinu.“

Manndrápið átti sér stað í götunni Drangahraun í Hafnarfirði. Um er að ræða iðnaðarhverfi en mennirnir leigðu herbergi í húsi við hliðina á verkstæði. Starfsmaður í húsinu, sem DV hafði samband við, varð ekkert var við atburðinn enda utan vinnutíma. Hann sagðist ekkert þekkja til mannanna sem leigja í húsinu.

„Í þessu húsi sem um ræðir þá urðu engir varir við hvað gekk á, en það eru ekki margir sem búa í þessu húsi,“ segir Grímur í samtali við DV.

Varðandi það hvernig lögreglan fékk vitneskju um atburðinn þá segir Grímur að vinur hins grunaða hafi hringt í lögreglu. Ekki er þar um að ræða manninn sem var handtekinn ásamt hinum grunaða á laugardag. Það virðist liggja fyrir að hinn grunaði hafi játað verknaðinn við þennan vin sinn en Grímur vildi þó ekki staðfesta það. „Ég vil ekki fara mikið út í þetta en það var vinur sem hringdi,“ segir Grímur.