Kvikmyndaleikstjórinn Anton Ingi Sigurðsson var á föstudaginn, 2. júní, sakfelldur í Héraðsdómi Reykjaness fyrir fjárdrátt og peningaþvætti. Var hann dæmdur í 10 mánaða skilorðsbundið fangelsi.

Meint brot varða ólögmæta ráðstöfun á tekjum fyrir kvikmyndina Grimmd sem Anton leikstýrði og sýnd var árið 2016. Í fyrsta lagi var Anton sakaður um að hafa dregið félagi í sinni eigu, Virgo Films ehf., samtals rúmlega 3,2 milljónir króna af fjármunum sem áttu að renna til framleiðslufyrirtækis myndarinnar, Virgo 2. Um var að ræða greiðslur frá 365 miðlum hf. fyrir sýningarrétt á myndinni.

Í öðru lagi var Anton sakaður um að hafa með samningi við Sagafilm, í nafni Virgo Films, ráðstafað sýningarrétti á kvikmyndinni Grimmd í „In-flight“ kerfi Icelandair og dregið Virgo Films það endurgjald sem greitt var fyrir sýningarréttinn, sem var ein milljón króna, þó að honum mætti vera ljóst að peningarnir tilheyrðu fyrirtækinu Virgo 2.

Í þriðja lagi var Anton sakaður um að hafa dregið sér fé frá Virgo 2 með því að millifæra peninga af bankareikningi félagsins inn á sinn persónulega bankareikning. Sá fjárdráttur nemur rúmlega 4,3 milljónum króna.

Einnig var Anton sakaður um að hafa dregið Virgo Films 18,5 milljónir króna af reikningi Virgo 2. Hann var auk þess sakaður um peningaþvætti með því að hafa aflað Virgo Films ávinnings af brotinu fyrir 18,5 milljónir króna. Um var að ræða fjármuni frá Senu fyrir sýningarrétt á myndinni.

Einum ákærulið vísað frá dómi

Anton neitaði sök fyrir dómi en héraðsdómur fann hann sekan í öllum ákæruliðum nema lið þrjú, þar sem hann var sakaður um að hafa millifært 4,3 milljónir af bankareikningi Virgo 2 yfir á sinn eigin reikning. Var það niðurstaða að annar maður hefði framkvæmt þessa millifærslu. Var þessum hluta ákærunnar vísað frá dómi.

Dóminn má lesa hér.