Vesturlönd hafa gripið til víðtækra refsiaðgerða gagnvart Rússum vegna innrásar þeirra í Úkraínu. Þar á meðal er vopnasölubann.
Bandarísk stjórnvöld hafa einnig gripið til refsiaðgerða gagnvart Ivan Aleksandrovitj Maslov, leiðtoga Wagner í Malí. Hann er sakaður um að notfæra sér ríki í Vestur-Afríku til að sneiða hjá vopnasölubanninu á Rússland.
Í tilkynningu frá bandaríska fjármálaráðuneytinu er því slegið föstu að Maslov hafi reynt að notfæra sér herstjórnina í Malí til að verða sér úti um jarðsprengjur, dróna og ratsjárkerfi til að nota í Úkraínu.
Uppskriftin er einföld. Vopnakaupin eru gerð í nafni Malí en vopnin eru send áfram til Rússlands að sögn Matthew Miller, talsmanns bandaríska utanríkisráðuneytisins. Maria Zakharova, talskona rússneska utanríkisráðuneytisins, vísaði þessum fullyrðingum á bug og sagði þær ekki eiga við nein rök að styðjast.
Í bandarískum leyniskjölum, sem var lekið á netið fyrir nokkrum mánuðum, kemur fram að forseti herstjórnarinnar í Malí hafi staðfest að Malí geti keypt vopn frá Tyrklandi fyrir hönd Rússa. Einnig kemur fram í skjölunum að rússneskir málaliðar hafi fundað með tyrkneskum tengiliðum í byrjun febrúar um kaup á vopnum og búnaði.
Matthew Miller tjáði sig ekki um hlut Tyrklands í málinu en sagði að Wagner-hópurinn sé reiðubúinn til að nota fölsuð skjöl í þessum viðskiptum.
