Það er allt annað en ódýrt að halda Eurovision og því fá Bretar að kynnast þetta árið en þeir héldu keppnina um helgina. Í raun átti keppnin að fara fram í Úkraínu en vegna stríðsins þar var það ekki mögulegt og tóku Bretar því að sér að halda keppnina.

Hún fór fram í Liverpool og var hin glæsilegasta eins og öll þjóðin veit eflaust eftir sjónvarpsgláp í síðustu viku.

CNBC segir að kostnaður BBC við að halda keppnina sé sem svarar til um fjögurra milljarða íslenskra króna.

Þátttökulöndin greiddu samtals sem svarar til um 500 milljónum íslenskra króna fyrir að vera með. Það er einmitt þessi kostnaður sem gerði að verkum að Búlgaría, Svartfjallaland og Norður-Makedónía voru ekki með. Löndin höfðu einfaldlega ekki efni á þátttöku að þessu sinni.