39 ára Íslendingur var handtekinn við landamæri Þýskalands og Hollands þann 25. febrúar síðastliðinn vegna gruns um umfangsmikið fíkniefnalagabrot.

Maðurinn var gómaður með átta lítra af amfetamínbasa í bænum Schüttorf aðfaranótt laugardagsins 25. febrúar. Fjallað var um málið á vef þýska miðilsins Meinestadt á dögunum, en Vísir greindi fyrst frá málinu hér á landi í morgun.

Maðurinn var á leið frá Hollandi til Þýskalands þegar landamæraverðir stöðvuðu för hans og spurðu hann ýmissa spurninga. Tekið er fram að maðurinn hafi neitað því að vera með eitthvað ólöglegt í fórum sínum en augljóslega verið stressaður vegna afskipta landamæravarða. Það hafi orðið til þess að bifreiðin var tekin til nánari skoðunar og efnin fundust í tveimur brúsum.

Maðurinn er sagður hafa haldið því fram að um hreinsiefni væri að ræða. Tollverðir tóku sýni úr vökvanum og leiddi prófun í ljós að um amfetamínbasa var að ræða.

Maðurinn er nú í gæsluvarðhaldi vegna málsins, að því er fram kemur í frétt Meinestadt.