Rekstraraðilar tveggja íslenskra einangrunarstöðva fyrir innflutta hunda eru ósáttir við hvor annan ef marka má færslur þeirra í Facebook-hópnum Innflutningur hunda á Íslandi.
Anna Jónsdóttir sem rekur Einangrunarstöðina í Höfnum skrifar færslu í Facebook-hópinn sem hún stílar til stjórnenda hópsins og skorar á þá að virða reglur þær sem þeir hafa sett fyrir hópinn. Einnig beinir hún orðum sínum til eigenda Einangrunarstöðvarinnar í Móseli og segir ekki hægt að horfa á innlegg þeirra sem annað en auglýsingu og rógburð gagnvart sér og sínu fyrirtæki.
Vísar Anna þar til til færslu eigenda Mósels í sama hópi frá því föstudaginn 17. mars, þar sem segir:
„Af gefnu tilefni þá viljum við koma því á framfæri að einangrunarstöðin Mósel er EKKI að loka. Því miður höfum við heyrt af því frá einstaklingum sem við treystum til þess að fara með rétt mál að eigandi einangrunarstöðvarinnar í Höfnum hafi sagt fólki að einangrunarstöðin Mósel sé að loka og að aðbúnaður og aðstaðan hjá okkur væri ólögleg/ófullnægjandi. Allt þetta á sér enga stoð í raunveruleikanum, þvert á móti, og þykir okkur miður að fólk finni sig knúið til þess að eyða tíma sínum og orku i að bera út þessar lygar.
Eigendur Einangrunarstöðvarinnar Mósel birtu færsluna einnig á Facebook-síðu stöðvarinnar.
Telur færsluna vera auglýsingu og rógburð
Eins og áður sagði telur Anna þessa færslu ekkert annað en auglýsingu í Facebook-hópnum og gerir athugasemd við að færslan sé ekki fjarlægð, en stjórnandi hópsins er starfsmaður Mósels:
„Ég vil einnig taka það fram að mér finnst sorglegt að sjá að starfsmaður Mósels sem er stjórnandi á þessari síðu sjái ekkert að þessu athæfi að fyrirtæki samkeppnisaðila sé tekið svona fyrir á þessari síðu sem gerð er til að innflytjendur geti leitað sér aðstoðar og spurt spurningar vegna innfluttnings dýra,“ segir Anna sem segir viðskiptahætti eigenda Mósels sorglega og þau viðhafa rógburð og meiðyrði í sinn garð.
„Birna og Kiddi eigendur Einangrunarstöðvarinnar í Móseli, ég veit ekki hvað rekur ykkur áfram með þessum síendurtekna rógburð og meiðyrði á hendur eiganda Einangrunarstöðvarinnar í Höfnum og er það virkilega sorglegt að sjá þessa viðskiptahætti ykkar,“ segir Anna sem segist hafa verið bent á þessa auglýsingu frá þeim Birnu og Kidda í Móseli.
„Að eigandi Einangrunarstöðvarinnar í Höfnum eigi að hafa verið með þann rógburð um fyrirtæki þeirra sé að fara að loka og á þetta ekki við nein rök að styðjast,“ segir Anna og segist fremur hafa viljað að eigendur Mósels hefðu haft samband við hana frekar en setja innlegg á netið til að auglýsa starfsemi sína.
„Þetta er ekki í fyrsta skiptið sem Eigendur Mósels og félagi þeirra fara á netið með rógburð og meiðyrði um samkeppnisaðila og auglýsi sitt fyrirtæki í sama innleggi og þykir okkur verulega sorglegt að fylgjast með þessum vinnubrögðum,“ segir Anna og segist bíða spennt eftir símtali eða fundi með eigendum Mósels til að fara yfir málin. Segir hún að henni þætti einnig vænt um að þeir löguðu auglýsingu sína: „Og sleppið því að hafa okkur sem part af henni enda erum við sitthvort fyrirtækið i svokallaðri samkeppni á markaði sem beygir sig undir lög Alþingis sem ber að virða.“
Vísar Anna síðan í brot úr lögum sem tengjast viðskiptaháttum og markaðsetningu, þar á meðan lög um bann við óréttmætum viðskiptaháttum:
6. gr.
Auglýsingar skulu þannig úr garði gerðar að ekki leiki vafi á að um auglýsingar sé að ræða. Skulu þær skýrt aðgreindar frá öðru efni fjölmiðla.
Auglýsingar og aðrar viðskiptaaðferðir skulu ekki vera ósanngjarnar gagnvart keppinautum eða neytendum vegna forms þeirra eða sökum þess að skírskotað er til óviðkomandi mála.
