Samt sem áður hafa Rússar lagt mikið undir í tilraunum sínum til að ná bænum á sitt vald. Að sama skapi hafa Úkraínumenn lagt mikið undir við að verjast sókn Rússa að bænum.
Á mánudaginn skýrðu úkraínsk yfirvöld frá því að úkraínski herinn muni halda áfram að verja bæinn en sú ákvörðun var tekin á fundi Volodymyr Zelenskyy, forseta, með yfirmönnum hersins.
Margir undrast þessa ákvörðun og benda á að víða sé barist af álíka mikilli hörku og að Bakhmut skipti ekki miklu máli hernaðarlega séð.
En ástæðan fyrir vilja Úkraínumanna til að verja Bakhmut er væntanlega að miklu leyti byggð á blóðugum útreikningi. Serhiy Chervaty, talsmaður úkraínska hersins í austurhluta Úkraínu, sagði að þennan varnarvilja megi meðal annars rekja til þess að Úkraínumenn fái meira út úr því að halda kyrru fyrir en við að yfirgefa bæinn.
Stríðsaðilarnir veita ekki upplýsingar um mannfall sitt en þær upplýsingar sem leka út benda allar í sömu áttina. Það er að báðir aðilar verði fyrir miklu mannfalli en að Rússarnir missi miklu fleiri hermenn og búnað en Úkraínumenn.
NATO telur að Rússar missi fimm hermenn fyrir hvern einn úkraínskan hermann sem fellur í bardögunum um Bakhmut. CNN skýrir frá þessu.
