Samgöngustofa hefur hafnað erindi konu frá Vancouver þess efnis að Icelandair beri ábyrgð á því að farangur hennar hafi verið rennblautur eftir heimkomu hennar frá Íslandi.

RÚV greinir frá þessu. Ferð konunnar var frá Osló til Vancouver með viðkomu í Keflavík og Seattle. Sendi hún með kvörtun sinni til Samgöngustofu myndir af blautum farangri sínum og greiðslukvittun fyrir þurrhreinsun. Segir hún vatnstjónið nema 380 þúsund krónum enda hafi dýrir hlutir verið í farangrinum sem voru ónýtir eftir ferðina. Líkir konan ferðinni til Íslands við stórslys og kvartar undan viðmóti Icelandair.

Samgöngustofa taldi ekki fullsannað að tjónið hafi átt sér stað í flugi og þar ræður úrslitum að konan fyllti ekki út svokallaða P.I.R. skýrslu á flugvellinum í Vancouver. Hún bendir hins vegar á að fluginu til Vancouver hafi seinkað og hafi hún þurft að flýta sér að ná lest.

Niðurstaðan var sú að Samgöngustofa hafnaði kröfum konunnar um að fá blautan farangur sinn bættan.

Nánar er greint frá málinu á vef RÚV.