Um helgina fór stór öryggismálaráðstefna fram í München í Þýskalandi. Þar sagði Mette Frederiksen, forsætisráðherra Danmerkur að það sé mikil hætta á að Rússar muni láta til skara skríða í fleiri löndum en Úkraínu og að Moldóva geti verið í hættu. „Það eru uppi áhyggjur um að Moldóva geti verið næsta landið sem Rússar hafa augastað á,“ sagði hún.
Flemming Splidsboel, sérfræðingur í rússneskum málefnum hjá dönsku hugveitunni DIIS, sagði í samtali við TV2 að ummæli Frederiksen geti verið til marks um að hún og aðrir vestrænir leiðtogar noti harða orðræðu til að halda fókus á innrás Rússa í Úkraínu.
Hann sagði ekki óhugsandi að Rússar auki við stríðsrekstur sinn og ráðist á önnur lönd. „Ég held að það sé mjög raunverulegt og líklegt að Rússar séu nú þegar byrjaðir að beita áhrifum sínum á ýmsum stöðum. Ég get vel ímyndað mér að valdaránsáætlanir séu til fyrir Moldóvu og að þær séu mjög raunverulegar,“ sagði hann.
Maia Sandu, forseti Moldóvu, hefur lýst yfir áhyggjum af fyrirætlunum Rússa í Moldóvu og hugsanlegri valdaránstilraun þeirra.
Splidsboel sagðist ekki sjá fyrir sér að valdaránsáætlanirnar samanstandi af áætlun um að ná forsetahöllinni. Frekar sé um að ræða áætlun um að valda óróa og mótmælum sem geti gefið Rússum yfirvarp til að láta til skara skríða. Einnig geti hugsast að þeir bíði næstu kosninga og reyni þá að hafa áhrif á úrslit þeirra til að fá nýja stjórn sem sé höll undir Rússa.
Hann sagði einnig að ekki sé útilokað að Rússar muni reyna að leggja önnur fyrrum ríki Sovétríkjanna undir sig. Ástæðan er að hans sögn sú að við lifum nú á „sögulegum tíma“ þar sem Pútín mun annaðhvort reyna að endurheimta gömlu Sovétríkin eða þar sem Vesturlöndum tekst endanlega að gera út af við gömlu hugsunina um Sovétríkin.
Auk Moldóvo benti Splidsboel á Georgíu og Armeníu sem líkleg skotmörk Pútíns. Rússar séu með herlið í báðum löndum og hafi Pútín neitað að kalla þau heim.
Claus Mathiesen, lektor við danska varnarmálaskólann, sagði að ef Rússar sigri Úkraínu eða nái stjórn á landinu á svipaðan hátt og þeir stjórna Hvíta-Rússlandi þá geti röðin komið að Georgíu eða Kasakstan.
Hann sagði ólíklegt, en ekki útilokað, að Rússar ráðist á Finnland áður en aðild þeirra að NATO er í höfn. Ólíklegast sé að þeir ráðist á Eystrasaltsríkin eða Pólland því það myndi væntanlega virkja sameiginleg viðbrögð NATO.
