Sigríður Hrund Pétursdóttir, einn eigandi Vinnupalla ehf. og formaður FKA, er allt annað en sátt við ónefndan áhrifavald sem birti í gær færslu þar sem að gjafaleikur var auglýstur og fyrirtæki Sigríðar Hrundar „taggað“ og sagt að 100 þúsund króna inneign væri í boði. Um grín var að ræða að hálfu aðilans en Sigríði Hrund var ekki hlátur í hug.
„Hér fengum við í Vinnupöllum óumbeðið tagg frá aðila sem tengist okkur ekkert. Hér er ekkert gjafafé að fá. Hér er verið að húkka far á okkar smartheitum, vinsældum, hversu vel við erum þekkt, hvað við erum þekkt fyrir og svo framvegis…hreinlega verið að „teika“,“ skrifaði Sigríður Hrund í færslu á Facebook-hópnum vinsæla Markaðsnördum þar sem hún óskaði eftir áliti og umræðum enda atvikið áhugavert fyrir aðila sem eru að byggja upp ímynd fyrirtækja á samfélagsmiðlum.
Sagði hún ennfremur að með athæfinu hafi umræddur áhrifavaldur tengt vörumerkið, sem eigendur hafa lagt blóð, svita og tár í við eitthvað sem að þau myndu aldrei bjóða okkur upp á.
„Viðkomandi fannst þetta fyndinn fössarahúmor þegar við gerðum þá kröfu að tengingin yrði fjarlægð á svipstundu því hún væri a. óumbeðin og b. skaðleg fyrir okkur,“ skrifaði Sigríður Hrund en rétt er að geta þess að viðkomandi varð þegar við beiðninni og fjarlægði færsluna.
Nokkuð fjörugar umræður sköpuðust um málið í Markaðsnördum og bárust fjölbreytt ráð. Allt frá því að allar auglýsingar séu góð auglýsing, ráðleggingar um að loka fyrir tögg frá öllum nema fylgjendum fyrirtækisins og yfir í að nýta hefði átt tækifærið með því að svara með húmorískum hætti og þannig mögulega auka sýnileika fyrirtækisins með jákvæðum hætti.
Uppfært: Í upphaflegu greininni var sagt að Guðmundur Birkir Pálmason, betur þekktur sem Gummi Kíró, hafi verið sá sem að bar ábyrgð á færslunni. Það reyndist þó á misskilningi byggt en annar aðili tók mynd af Guðmundi og birti umrædda færslu. Guðmundur er beðinn afsökunar á þessum mistökum
