Landsréttur sneri við rétt í þessu meiðyrðadómi héraðsdóms yfir Breka Karlssyni og Neytendasamtökunum. Haustið 2021 fékk danska smálánafyrirtækið eCommerce 2020 ummæli Breka um dæmd dauð og ómerk. Breki og samtökin voru þó sýknuð af kröfu um greiðslu miskabóta. En eftirfarandi ummæli sem Breki lét falla í tölvupósti voru dæmd dauð og ómerk:
„the loans have been deemed illegal in Iceland.“
„whose only operation is illegal predatory lending.“
„These loans have been ruled illegal in Iceland by both courts and the Consumer surveillance agency.“
„illegal transfers.“
Tölvupóstana sendi Breki til tveggja greiðslumiðlana til að láta þær vita að þær væru mikilvægur hlekkur í smálánakeðjunni á Íslandi, sem gerði mögulegar úttektir af reikningum fólks. Fjölmargir hefðu þá haft samband við samtökin og óskað eftir aðstoð við að stöðva það sem þau töldu ólöglegar úttektir. (Sjá nánar Vísir.is)
Sem fyrr segir sneri Landsréttur dómnum við og ummæli Breka um smálánakóngana eru hér með orðin lögleg. Dómurinn hefur ekki verið birtur á vef dómstólana en í niðurstöðu segir:
„Áfrýjandinn, Breki Karlsson, er sýkn af kröfu stefnda, eCommerce 2020 ApS, um að ummæli í tölvupósti hans til Quickpay ApS 6. ágúst 2020 og Clearhaus A/S 20. ágúst, verði dæmd dauð og ómerk.“
Smálánakóngarnir þurfa að greiða Breka og Neytendasamtökunum eina milljón króna í málskostnað.
DV ræddi stuttlega við Breka og lýsti hann yfir ánægju sinni með niðurstöðu Landsréttar. Orðrétt sagði hann við blaðamann:
„Það er léttir að fá málfrelsi á ný. Auðvitað verða samtökin og forsvarsmenn að geta gagnrýnt það sem við teljum vera ámælisvert og þegar við teljum rétt neytenda vera fótum troðinn.“
