Eyjólfur Ármannsson, þingmaður Flokks Fólksins, telur að miðlunartillaga ríkissáttasemjara í kjaradeilu Samtaka atvinnulífsins og Eflingar sé ólögleg. Telur þingmaðurinn, sem er lögfræðimenntaður, að Aðalsteinn Leifsson, ríkissáttasemjari, hafi þurft ráðfæra sig við deiluaðila áður en tillagan var gerð en það hafi ekki verið gert. Þetta kom fram í Silfrinu á RÚV í umsjón Egils Helgasonar en gestir þáttarins voru þingmennirnir og lögfræðingarnir Eyjólfur Ármannsson úr Flokki Fólksins, Diljá Mist Einarsdóttir frá Sjálfstæðisflokknum, Arndís Anna Kristínardóttir Gunnarsdóttir úr Pírötum og Jódís Skúladóttir úr VG.
Í þættinum var meðal annars rætt um að ekki hafi neitt sérstakt neyðarástand skapast og mögulega hafi ríkissásttasemjari verið full bráðlátur. „Hann var alltof fljótur á sér. Ég tel að þetta sé bein árás á samningafrelsi í landinu og verkalýðshreyfinguna,“ segir Eyjólfur.
Hann bendir á að miðlunartillagan byggist á tilboði sem Samtök atvinnulífsins hafi þegar lagt fram og að samningarnefnd Eflingar hafi þegar hafnað. Tillagan grafi því undan stjórn Eflingar.
„Ég trúi ekki öðru en að það, bara að leggja fram þessa miðlunartillögu, fari fyrir dóm,“ sagði Eyjólfur og bætti við að hann ætti ekki von á öðru en að verkalýðshreyfingin í heild sinni myndi mótmæla þessum gjörningi.
Það virðist vera að ganga eftir en fyrr í dag sendi miðstjórn Rafiðnaðarsambands Íslands frá sér ályktun þar sem óeðlileg og ótímabært inngrip ríkissáttasemjara var fordæmt.
„Miðstjórn RSÍ skorar á ríkissáttasemjara að draga miðlunartillögu sína til baka og láta af fordæmalausum aðgerðum gegn stéttarfélagi sem með lögmætum hætti leggur sitt af mörkum að ná ásættanlegum kjarasamningi fyrir sitt félagsfólk. Jafnframt ber ríkissáttasemjara að gæta jafnræðis á milli samningsaðila og stilla sér ekki upp í hóp atvinnurekenda með jafn afgerandi hætti og raun ber vitni. Að leggja fram tilboð atvinnurekenda sem miðlunartillögu sýnir skort á tengingu við málstað verkalýðsfélagsins,“ segir í ályktuninni.
