Aðalsteinn Leifsson ríkissáttasemjari er sannarlega maður vikunnar. Útspil hans í deilingu Samtaka atvinnulífsins og Eflingar hefur sett allt á annan endann í samfélaginu og sitt sýnist hverjum. Aðalsteinn var gestur Einars Bárðarsonar í hlaðvarpsþætti hans þar sem þeir Aðalsteinn ræddu um vægi sáttamiðlunar í samfélaginu.
Ýtt undir stofnun sáttamiðlunarstofnunar
Síðustu ár hefur Aðalsteinn beitt sér fyrir eflingu sáttamiðlunar í íslensku samfélagi með aðstoð og aðkomu írsku sáttamiðlunarstofnunarinnar sem hefur staðið fyrir námskeiðum hér á landi. Þannig hefur Aðalsteinn beitt sér fyrir aukinni fagmennsku og auknu vægi sáttamiðlara og þar lýsir hann hvernig þeir eru að vinna grunn að slíkum vettvangi.
Í hlaðvarpinu lýsir Aðalsteinn einnig muninum á umboðslausum sáttamiðlara og hlutverki hans sem milligönguaðila á milli deilenda annars vegar og starfsvettvangi ríkissáttasemjara hins vegar sem hefur umboð stjórnvalda félagasamtaka og lagaramma til að vinna með. Samtalið er áhugavert og jafnvel enn áhugaverðara í ljósi þróunar síðustu sólarhringa.
Sjá einnig: Gera alvarlegar athugasemdir við inngrip ríkissáttasemjara
Við ráðningu Aðalsteins í starf ríkissáttasemjara sagði í tilkynningu frá félagsmálaráðuneytinu að Aðalsteinn hefði víðtæka þekkingu og reynslu á samningamálum en auk fræðilegrar þekkingar hefur hann reynslu af þátttöku í samningaviðræðum, kennslu í samningatækni, ráðgjöf við samningsaðila og aðstoð við deiluaðila við að bæta samskipti en allt er þetta reynsla og þekking sem talin er mikilvæg þegar kemur að því að skipa í embætti ríkissáttasemjara.
Hlusta má á viðtalið í heild sinni hér.
