Úkraínumenn nota vopnin í stríðinu gegn Rússum en margir hafa áhyggjur af því að þessar vopnasendingar getið komið í bakið á Vesturlöndum og öðrum síðar. Ástæðan er að þegar stríðinu lýkur verður allt fljótandi í vopnum í Úkraínu og mörg þeirra munu enda á svartamarkaðnum og þar með í höndum glæpamanna og hryðjuverkamanna.
„Það verður næstum útilokað að koma í veg fyrir vopnasmygl. Við sluppum ekki við það eftir borgarastyrjöldina í fyrrum Júgóslavíu og við munum ekki sleppa við það í Úkraínu,“ sagði Jana Cernochova, varnarmálaráðherra Tékklands, nýlega. Jótlandspósturinn skýrir frá þessu.
Enginn hefur yfirsýn yfir hvaða vopn og hvaða magn hefur verið sent til Úkraínu en vitað er að mikið hefur verið sent af þróuðum og öflugum vopnum sem úkraínski herinn hefur mikla þörf fyrir. Auk þess hefur mikið af skammbyssum, rifflum, skotfærum og handsprengjum verið sent til landsins auk vopna sem er hægt að beita gegn skriðdrekum.
Sérfræðingar og embættismenn hjá ESB og bandarískir embættismenn telja mikla hættu á að eitthvað af þessum vopnum endi í röngum höndum.
Jürgen Stock, yfirmaður Alþjóðalögreglunnar Interpol, var einn sá fyrsti til að benda á þetta. Á fréttamannafundi í júní sagði hann að þegar stríðinu lýkur í Úkraínu muni ólögleg vopn byrja að streyma út úr landinu. Það sé þekkt frá fyrri stríðsátökum og nú þegar séu glæpamenn farnir að beina sjónum sínum að vopnunum í Úkraínu. „Við megum eiga von á straumi vopna til Evrópu og áfram til annarra heimsálfa,“ sagði hann.
