Héraðsdómur Reykjavíkur hefur fellt úr gildi ákvörðun ÁTVR um að taka tvær bjórtegundur frá innflutningsfyrirtækinu Dista ehf. úr sölu, Faxe Witbier og Faxe IPA.
Rökstuðningur ÁTVR fyrir þeirri ákvörðun var sú að tegundirnar hefðu ekki náð nægilega mikilli sölu. Dista taldi ákvörðunina vera ólöglega á grundvelli einokunarstöðu ÁTVR sem smásala áfengis.
Tekist var á um þetta fyrir héraðsdómi og túlkanir á tilteknum greinum samkeppnislaga, sem og laga um verslun með áfengi og tóbak, en þar er kveðið sérstaklega á um hlutverk ÁTVR. Í 11. grein laganna er kveðið á um að jafnræðis skuli gætt við val á vöru og ákvörðun um sölu og dreifingu áfengis.
ÁTVR tefldi í málsvörn sinni fram rökum um að fyrirtækinu bæri að stuðla að hagkvæmni í rekstri. Í fjórðu grein áðurnefndra laga segir að starfsemi ÁTVR skuli vera sem hagkvæmust og afla tekna sem nægi til að greiða rekstrarkostnað og skila arði til ríkissjóðs.
Það var niðurstaða héraðsdóms eftir að hafa vegið og metið þessi lagarök að fella úr gildi ákvörðun ÁTVR um að taka úr sölu bjórtegundirnar frá Dista. Jafnframt skal ÁTVR greiða málskotnað upp á 1.750.000 krónur.
