Landsréttur hefur þyngt dóm héraðsdóms yfir Ingþóri Halldórssyni fyrir fíkniefnalagabrot og peningaþvætti. Héraðsdómur dæmdi hann í tveggja ára skilorðsbundið fangelsi en Landsréttur taldi brotið það alvarlegt að ekki væri komist hjá fangelsisvist og taldi ekki koma til greina að skilorðsbinda refsinguna.
Dómurinn yfir Ingþóri var birtur á vefsíðu dómstólanna á föstudag en hefur verið tekinn út aftur, af ókunnum ástæðum. Hér er stuðst við frétt mbl.is af málinu.
Ingþór var ákærður fyrir stórfellt fíkniefnalagabrot árið 2017, var hann sakfelldur fyrir innflutning á rúmum tveimur kílóum af kókaíni, í félagi við annan mann. Hann var einnig ákærður fyrir peningaþvætti með því að hafa „tekið við, nýtt, umbreytt og/eða aflað sér ávinnings af refsiverðum brotum allt að fjárhæð 7.480.145 krónur,“ eins og segir orðrétt í dómnum.
Sem fyrr segir tók Landsréttur skilorðið af dómi héraðsdóms og Ingþór þarf að sitja dóminn af sér. Hins vegar kom langur rannsóknartími málsins til refsilækkunar. Tvö og hálft ár liðu frá upphafi rannsóknar til ákæru. Ákæra kom fram í málinu í febrúar árið 2020.
