Íbúar í Sjejverodonetsk í Luhansk í Úkraínu vita svo sannarlega af því að rússneskar hersveitir sækja að þessari iðnaðarborg. Serhij Hajdaj, héraðsstjóri í Luhansk, segir að Rússar láti flugskeytum og stórskotaliðshríð rigna yfir borgina og geri auk þess loftárásir á hana.

Í samtali við AFP sagði hann að staðan sé mjög erfið og versni með hverri klukkustundinni sem líður. „Þeir eru einfaldlega að eyða Sjeverodonetsk af yfirborði jarðar,“ sagði hann.

Eftir misheppnaða sókn sína að höfuðborginni Kyiv hörfaði rússneski herinn þaðan og hefur síðan einbeitt sér að Donbas en það er svæði sem Luhans og Donetsk mynda. Fjöldi Rússa býr í héraðinu. Það eru þeir sem Vladímír Pútín, Rússlandsforseti, segist vera að bjarga frá „úkraínskum nasistum“.

Volodymyr Zelenskyy, forseti Úkraínu, gefur ekki mikið fyrir þessi orð Pútíns og segir að Rússar séu að „jafna allt við jörðu í Donbas“.

Það er ekki neitt nýtt að barist sé í Donbas því aðskilnaðarsinnar, hliðhollir Rússum, hafa barist gegn úkraínskum hersveitum þar síðan 2014 og hafa notið stuðnings Rússa.