Það vakti mikla þjóðarathygli í marsmánuði þegar Edda Björk Arnardóttir nam þrjá syni sína á brott frá Noregi í einkaflugvél. Undanfarin ár höfðu drengirnir búið ytra hjá föður sínum sem hafði yfir þeim fulla forsjá eftir langa og stranga baráttu þar sem Edda Björk var dæmd í sex mánaða óskilorðsbundið fangelsi í Noregi fyrir að hafa haldið drengjunum hérlendis þrátt fyrir að forræðið væri í höndum barnsföður hennar.
Ljóst var því að framundan væri mikil barátta varðandi forsjá drengjanna sem enn dvelja hérlendis hjá móður sinni og hafa hafið skólagöngu hér.
Edda Björk greinir frá því á Facebook-síðunni að síðastliðinn föstudag hafi hún verið handtekinn af tveimur íslenskum lögregluþjónum að beiðni lögreglunnar. Það sem lá að baki handtökunni var framsalsbeiðni á hendur Eddu Björk þar sem þess var krafist að hún myndi fullnusta þeim sex mánuðum af áðurnefndum fangelsisdóm sem hún hlaut ytra. Þá var þess krafist að hún yrði sett í farbann hérlendis þar til að þessu yrði.
„Ég fór í skýrslutöku og svo fyrir dómara þar sem ég svaraði hvort ég samþykkti afhendingu og einnig spurningu um farbann. Ég merkilegt nokk hafnaði báðum kröfum,“ skrifar Edda Björk í færslunni.
Hún greinir svo frá því að héraðsdómari hafi hafnað farbannskröfunni strax á föstudeginum. Saksóknari hafi kært þann úrskurð en ákveðið svo að draga þá ákvörðun tilbaka. Í dag hafi Edda Björk svo fengið tilkynningu um að Ríkissaksóknari hafi hafnað beiðni norskra yfirvalda um framsal hennar til Noregs.
Edda Björk hrósar svo lögreglumönnunum fyrir sín störf. „Ég vil taka fram að lögreglumennirnir sem handtóku mig voru í alla staði frábærir, gerðu þetta eins vel og þægilega og mögulegt er í svona stöðu. Eiga bara hrós skilið fyrir alla framgöngu.“
Hún segir ennfremur meðvituð um að slagurinn sé hvergi nærri búinn en hún kvíði engu enda telur hún að hún sé með frábæra lögmenn sér við hlið.