Salling Group sem er stærsta fyrirtækið á smásölumarkaði matvæla í Danmörku tilkynnti í morgun að fyrirtækið muni nú setja þak á hversu hátt verðið á 100 til 200 nauðsynjavörum getur farið í verslunum keðjunnar. Fyrirtækið rekur Bilka, Netto og Føtex verslunarkeðjurnar.

Fyrirtækið heitir því að verðið á ákveðnum vörum muni ekki fara yfir ákveðið þak fram til loka október. Um 100 vörur er að ræða í Netto og 200 í Bilka og Føtex.  Heitir fyrirtækið því að þótt innkaupsverðið hækki á þessum tíma muni það ekki skila sér út í verðlagið. Aðallega verður um vörur að ræða sem falla undir eigið vörumerki fyrirtækisins.

Matvörur hafa hækkað mikið í verði í Danmörku síðustu mánuði og mælist verðbólgan nú rúmlega sjö prósent. Þetta er mikil breyting fyrir Dani sem hafa búið við mjög stöðugt verðlag og kaupmátt áratugum saman.

Í tilkynningu Salling Group segir að ef það óvænta gerist og innkaupsverðið á vörunum lækki þá muni það strax skila sér til neytenda.

Fyrirkomulagið verður tekið til endurskoðunar í byrjun nóvember.