New York Times segir að í skýrslunni komi fram að reiknað sé með vaxandi óróleika meðal valdhafanna í Kreml.
Áður en Rússar réðust inn í Úkraínu var það áætlun Bandaríkjamanna að gera leyniþjónustuupplýsingar sínar um áætlanir Pútíns um innrás opinberar. Ekki er vitað hver eða hverjir eru heimildarmenn Bandaríkjanna innan veggja Kreml enda gæta Bandaríkjamenn þeirra upplýsinga jafn vel og ef ekki betur en gullforða síns. En upplýsingarnar reyndust að mestu réttar eftir því sem New York Times segir.
Í fyrrnefndri skýrslu kemur fram að nánustu ráðgjafar Pútíns hafi villt um fyrir honum hvað varðar þá mótspyrnu sem rússnesku hersveitirnar máttu reikna með að mæta í Úkraínu. Hann er sagður hafa fengið lélegar og of bjartsýnar upplýsingar um hvernig innrásin myndi ganga fyrir sig.
Eftir því sem segir í annarri leyniskýrslu bandarískra leyniþjónustustofnana þá hefur þetta orðið til þess að Pútín treystir ekki ráðgjöfum sínum lengur og hefur djúp gjá myndast á milli hans og varnarmálaráðuneytisins.
Kate Bedingfield, talskona Hvíta hússins, sagði að bandarísk stjórnvöld telji að ráðgjafar Pútíns hafi villt um fyrir honum um getu rússneska hersins og hvernig rússneska efnahagskerfið myndi lamast vegna refsiaðgerða Vesturlanda. „Þeir eru of hræddir til að segja honum sannleikann,“ sagði hún. Hún sagði að bandarísk stjórnvöld hafi ákveðið að opinbera þessar upplýsingar til að sýna „taktísk mistök“ Rússa í tengslum við innrásina.
Reuters hefur eftir heimildarmönnum innan varnarmálaráðuneytisins að einnig búi sú hugsun að baki birtingar skýrslunnar að flækja málin fyrir Pútín hvað varðar taktíkina í Úkraínu og að hræða rússneska ráðamenn. „Þetta getur hugsanlega verið gagnlegt. Getur þetta skapað óeiningu hjá forystunni? Þetta getur orðið til þess að Pútín skipti um skoðun á hverjum hann getur treyst,“ er haft eftir ónafngreindum heimildarmanni.
BBC segir að ráðamenn í Kreml hafi haft miklar áhyggjur af öllum þeim upplýsingum sem Bandaríkin og NATÓ birtu í aðdraganda innrásarinnar. Grunur leiki á að njósnarar á vegum Vesturlanda starfi innan veggja Kremlar eða þá að samskipti rússneskra ráðamanna séu hleruð.
Sergei Shoigu, varnarmálaráðherra, hefur lengi verið einn nánasti samstarfsmaður Pútíns og vinur en samband þeirra er sagt hafa versnað mikið vegna þess hversu illa rússneska innrásarhernum gengur í Úkraínu.
