„Í sinni einföldustu mynd er þetta þannig að þú lendir á þessum flugvelli, hann er lítill, þú ert svona hálftíma í gegnum hann og þú ferð beint upp í rútu ef þú vilt það, farið kostar 20 dollara, og hún er svona klukkutíma og 20 mínútur til Manhattan. Í rútunni er þráðlaust net og salerni, “ segir Birgir Jónsson, forstjóri PLAY, en staðsetning flugvallar sem PLAY flýgur til í væntanlegu New York flugi sínu sem hefst í sumar hefur verið nokkuð til umræðu meðal netverja í dag.

Eins og kom fram í frétt DV fyrr í kvöld hafa sumir tekið stórt upp í sig og fullyrt að ferðalagið frá þessum flugvelli til New York sé svo langt og flókið að þjónustan sé í rauninni ónýt.

Birgir bendir á að margir leigi sér einfaldlega bílaleigubíl á flugvellinum og aki greiða leið á áfangastað og svo er þessi einfalda rútuferð í boði sem getur um hér að ofan, sem vissulega tekur nokkra stund en þykir þægileg.

Birgir segir að lestarferðir sem rætt hefur verið um á Twitter séu ekki frá flugvellinum heldur séu þær lestarstöðvar í nágrenni hans og auðvelt sé að komast hjá lestarferðalagi inn í borgina. Það sé undir hverjum og einum komið hvaða ferðamáta hann velji.

„Auðvitað þarf þetta að skoðast í því samhengi að miðinn á mann kostar svona 200 til 250 dollurum undir því sem samkeppnin er að bjóða. Ef um par er að ræða þá er þetta 50-60 þúsund króna sparnaður, enn meira ef fjölskylda er að ferðast. Það eru alvöru peningar. Segjum sem svo að þú sért hálftíma lengur inn í bæ og borgir 20 dollara fyrir lestarferð, þá er þetta alvöru sparnaður, við erum lággjalda flugfélag og stílum inn á þann markhóp, höfðum til fólks sem vill frekar gera vel við sig í fríinu en eyða of miklum peningum í rándýran flugmiða. Ef fólk vill það ekki þá eru aðrir kostir í boði, það er fegurð hins frjálsa markaðar,“ segir Birgir.

Hann bendir á að PLAY megi líkja við Bónus á matvörumarkaðnum og fólk velji einfaldlega sjálft hvert það vill beina sínum viðskiptum.

Nánar má lesa um New York flug Play hér.