Mikil óánægja hefur brotist út vegna þeirrar ákvörðunar borgarstjórnar Reykjavíkur að leggja niður starf Vinjar, dagseturs fyrir fólk með geðraskanir, á Hverfisgötu. Á dögunum tók Einar Þorsteinsson, formaður Borgarráðs, við lista með um 4.000 undirskriftum þar sem fyrirætlununum var mótmælt harðlega. Benda gagnrýnendur á að starfið í Vin sé einstakt og að álag á önnur úrræði muni aukast verulega ef að starfið verður lagt niður.
Reykjavíkurborg tók við reksti Vinjar í sumar af Rauða krossinum. Einar var gestur Fréttavaktarinnar á Hringbraut á dögunum og þar velti hann því fyrir sér hvort að hægt væri að snúa tilbaka til fyrra horfs.
„Ég velti því upp, þetta byrjaði sem sjálfboðaliðaverkefni af hálfu Rauða krossins, starfsemin í húsinu er þess eðlis að það þarf ekki endilega fagfólk til þess að sinna því. Ég velti fyrir mér hvort einhverjir af þessum 4.000 sem skrifuðu undir þetta eða Rauði krossinn eða aðrir sem vilja sinna þessum hópi með þessum hætti vilji gera það áfram,“ sagði Einar.
Þessi orð hans hafa fallið í grýttan jarðaveg.
„Ummæli Einars eru óheppileg og vísbending um að hann áttar sig ekki á mikilvægi félagsmiðstöðvarinnar, áttar sig ekki á mikilvægi þess að hafa þjálfað fólk til að starfa með þessum hópi,“ er haft eftir Margréti Ásgeirsdóttur í frétt Fréttablaðsins.
Undir það tekur Sanna Magdalena Mörtudóttir, borgarfulltrúi Sósíalista „Mér finnst ótrúlegt að maðurinn skuli láta svona út úr sér. Hann kastar ábyrgðinni frá sér,“ segir Sanna sem telur ummæli Einars til marks um vanþekkingu þeirra sem hafi völdin um framtíð Vinjar.
