En því trúa ekki allir, sérstaklega ekki þegar horft er til þess að Rússar eru í miklum vandræðum í Úkraínu þar sem úkraínski herinn hefur frumkvæðið í stríðinu.
Danska ríkisútvarpið hefur eftir Flemming Splidsboel, sérfræðingi í rússneskum málefnum hjá Dansk Institit for Internationale Studier (DIIS) að mikið sé um orðróma um nýja herkvaðningu í Rússlandi. Yfirvöld staðhæfi að sú leið verði ekki farin en almenningur viti að stríðsreksturinn gengur illa og því fari orðrómar af þessu tagi af stað.
Um helgina skýrðu fjölmiðlar víða um heim frá því að rússnesk yfirvöld reyni nú að lokka fleiri til liðs við herinn. CNN segir að áróðursmyndböndum hafi fjölgað mjög á rússneskum samfélagsmiðlum á síðustu dögum. Í einu þeirra ákveður ungur maður að fara í stríð í stað þess að skemmta sér með vinum sínum. Síðan kaupir hann sér bíl fyrir launin hjá hernum. Fleiri álíka myndbönd eru í dreifingu en með þeim er reynt að láta líta út fyrir að hermennska sé eftirsóknarverð.
BBC segir að nú verði tónlistarmenn sendir í fremstu víglínu til að hvetja hermennina til dáða og bæta baráttuanda þeirra.
Í einu af áróðursmyndböndunum sjást tveir ungir menn horfa á vel klæddan mann, starfsmann í fjármálageiranum, setja föggur sínar inn í bíl og segja að hann sé að yfirgefa Rússland og fari til Georgíu. Á sama tíma kemur eldri kona út úr verslun. Hún missir vörur sínar en vel klædda manninum er alveg sama um það en hins vegar flýta ungu mennirnir sér henni til aðstoðar. „Drengirnir hafa yfirgefið landið en karlmennirnir eru hér,“ er þá sagt. Hér fyrir neðan er hægt að sjá myndbandið.
A new propaganda video mocking Russians who left the country because of the mobilisation is circulating on Telegram
"The boys have left but the men have stayed" pic.twitter.com/Taxf1cd8GD
— Francis Scarr (@francis_scarr) December 7, 2022
Myndbandið fellur vel að ummælum Pútíns fyrir nokkrum mánuðum þegar hann ræddi um þá Rússa sem hafa yfirgefið Rússland. Hann kallaði þá svikara og er ekki annað að sjá en vel klæddi maðurinn sé einmitt þannig týpa.
