Árnmar Jóhannes Guðmundsson var í apríl dæmdur í átta ára fangelsi fyrir skotárás sem framin var á Egilsstöðum í ágúst í fyrra. Málinu var áfrýjað til Landsréttar og hófst aðalmeðferð í málinu þar í gær. Í málflutningi Helga Magnúsar Gunnarssonar vararíkissaksóknara var lögð áhersla á þau atriði sem Árnmar neitar sök á í málinu, til að mynda tveimur tilraunum til manndráps.

Fréttablaðið fjallar um aðalmeðferðina í dag og greinir frá því að ágreiningur virðist vera um trúverðugleika lögreglumannsins sem mætti á vettvang kvöldið sem skotárásin var framin. Ákæruvaldið telur að framburður lögreglumannsins sé trúverðugur og að hann hafi verið skýr en dómari í málinu velti því fyrir sér hvort lögreglumaðurinn hafi einhverja hagsmuni af því að segja ekki satt og rétt frá málsatvikum.

Ákæruvaldið sagðist telja að svo væri ekki. Helgi Magnús sagðist halda að ef lögreglumaðurinn væri með ásetning til að segja ósatt þá hefði hann valið skynsamlegri leið til að gera það.

Þegar Helgi Magnús flutti málið vöktu skothvellir athygli viðstaddra í dómsalnum. Skothvellirnir bárust að utan en í frétt Fréttablaðsins segir að dómari hafi tekið augnablik til að útskýra fyrir öllum í salnum hvaðan þessir skothvellir væru að koma, sérsveitin var við æfingar fyrir utan Landsrétt á meðan aðalmeðferðin fór fram.