Næstkomandi þriðjudag verður þingfesting í Héraðsdómi Reykjavíkur í máli gegn Hrannari Fossberg Viðarssyni sem ákærður er fyrir skotárás í Grafarholti í febrúar á þessu ári.
DV er með ákæru héraðassaksóknara í málinu undir höndum. Árásin átti sér stað aðfaranótt fimmtudagsins 10. febrúar, á bílastæði við götuna Þórðarsveig. Hrannar er ákærður fyrir tilraun til manndráps og vopnalagabrot. Skotið var á unga konu og ungan karlmann úr bíl sem Hrannar var farþegi í. Skotin höfnuðu í kvið konunnar og vinstra læri mannsins. Samkvæmt ákæru hlaut konan opið sár á kviðlegg auk áverka á þvagblöðru og rofs á neðanverðum ristli. Maðurinn hlaut sár á neðanverðu vinstra læri.
Í ákæru kemur fram að Hrannar var ekki með skotvopnaleyfi og vopnið sem hann beitt var skammbyssa af gerðinni Beretta.
Héraðssaksóknari gerir kröfu um að Hrannar verði dæmdur til refsingar og greiðslu alls sakarkostnaðar. Ennfremur er krafist upptöku á byssunni.
Konan sem varð fyrir árásinni gerir kröfu um miskabætur upp á 5 milljónir króna. Einnig krefst hún þess að hinn ákærði greiðir henni útlagðan sjúkrakostnað upp á 300 þúsund krónur. Miskabótakrafa karlmannsins hljóðar upp á 3,5 milljónir.
Sem fyrr segir verður málið þingfest í næstu viku. Má því búast við að aðalmeðferð fyrir dómi verði á fyrri hluta næst árs.
