Á tólfta tímanum í gærkvöldi var lögreglunni tilkynnt um kannabislykt í Hlíðahverfi. Þegar lögreglan kom á vettvang flúði meintur gerandi af vettvangi á rafmagnshlaupahjóli og var með hund á palli hjólsins. Eftirförin var stutt en hún endaði á Klambratúni þar sem viðkomandi var króaður af og handtekinn fyrir að hafa ekki farið að fyrirmælum lögreglu.

Í kjölfarið voru hinn handtekni og hundurinn hans fluttir á lögreglustöð. Því næst var húsleit gerð heima hjá hinum handtekna. Þar fannst lítilræði af meintum fíkniefnum.

Á ellefta tímanum hafði lögreglan afskipti af tveimur aðilum sem eru grunaðir um vörslu og neyslu fíkniefna. Hald var lagt á meint fíkniefni.

Í Bústaðahverfi var tilkynnt um líkamsárás á fyrsta tímanum í nótt. Bæði meintur gerandi og árásarþoli voru á vettvangi þegar lögregluna bar að garði. Málið unnið með hefðbundnum hætti.