Guðni Halldórsson, formaður Landsambands hestamanna, segir að skítkast og óhróður fæli fólk frá því að taka að sér sjálfboðaliðastörf í félögum hestamanna og víðar í íþróttahreyfingunni. Þetta kom fram í ræðu Guðna á Landsþingi hestamannafélaganna sem fram fór um síðustu helgi.

Fjallað er um ræðuna og hún birt í heild á vef Eiðfaxa.

Í ræðunni tilgreinir Guðni tvö sláandi dæmi um það áreiti og í raun andlega ofbeldi sem hann hefur orðið fyrir vegna starfa sinna fyrir hestamannahreyfinguna. Hefur honum verið hótað ærumissi og ofbeldi úr undirheimum:

„Ég tek hér tvö örstutt dæmi um aðstæður sem hver og einn getur sett sig inn í. Ég var með fólk í mat heima hjá mér, nánar til tekið formann eins af íslandshestasamtökunum í Evrópu sem ég hef kynnst í gegn um starfið. Þegar ég kíki svo á símann bíða mín 8 sms. skilaboð frá einum aðila þar sem ég er úthrópaður aumingi, vesalingur, ræfill og svo framvegis. Í síðustu skilaboðunum eru svo bein hótun um að ég muni hljóta verr af enda sé viðkomandi sendandi vel tengdur í undirheimum. Einnig langar mig að taka dæmi af því þegar ég kom fram eftir að hafa verið að lesa fyrir 7 ára dóttur mína á virku kvöldi. Þá bíður mín símtal frá mjög áhrifamiklum manni í íslensku samfélagi. Manni sem hefur bæði mikil ítök í viðskiptalífinu og stjórnmálum. Sá hélt 5 mínútna einræðu um það hversu mikill aumingi og vesalingur ég væri og að hann myndi sjá til þess að allir á Íslandi myndu vita hversu mikill vesalingur og mannleysa Guðni Halldórsson væri. Hann myndi einnig sjá til þess að vinnuveitendum og atvinnurekendum yrði gert ljóst hversu skítlegan mann og ræfil ég hefði að geyma.“

Segir Guðni að samskipti af þessu tagi séu því miður ekki einsdæmi og sé þessi ómenning að verða viðvarandi vandamál innan íþróttahreyfingarinnar. Hefur hann rætt vandann við forseta og framkvæmdastjóra ÍSÍ og ráðherra íþróttamála. Telur hann að hér sé um að ræða meinsemd sem hestamenn verði að taka á.