Stéttarfélagið MATVÍS hefur sent frá sér yfirlýsingu í kjölfar frétta um að veitingastaðirnir Bambus og Flame undirbúi málsókn gegn félaginu. Ástæða málsóknarinnar eru fullyrðingar frá MATVÍS um alvarleg brot veitingastaðanna gegn starfsfólki sínu. Segja forsvarsmenn veitingastaðanna að MATVÍS hafi haldið því fram að starfsfólkið hafi verið beitt mansali og stórfelldum þjófnaði. Sjá frétt RÚV.
Veitingastaðirnir hafna fullyrðingum um að starfsfólkið hafi unnið 10-16 tíma á dag sex daga vikurnar. Hins vegar viðurkenna staðirnir að hafa ekki greitt fólkinu rétt laun og segja að það hafi verið mistök.
MATVÍS segir í yfirlýsingu sinni að það liggi fyrir að starfsmenn þessara veitingastaða hafi verið hlunnfarnir og segir að enn hafi ekki verið gert upp við fólkið að fullu.
„MATVÍS vonaðist eftir að málið kláraðist í samtali á milli aðila en því miður höfnuðu atvinnurekendurnir lögfræðingi MATVÍS um að greiða fólkinu það sem félagið telur þau eiga inni,“ segir í yfirlýsingunni.
Matvís segir að málið fari fyrir dómstóla en félagið hræðist ekki hótanir um lögsókn. Peningunum væri hins vegar betur varið í að gera upp við starfsfólkið:
„Málið fer því fyrir dómstóla. MATVÍS hræðist ekki hótanir um lögsókn en telur þó að þeim peningum sem eytt verður í þá málsókn myndu nýtast betur til þess að greiða fyrrum starfsmönnum veitingastaðanna það sem þau eiga inni. Þannig væri ágreiningurinn einnig afgreiddur. Yfirlýsing atvinnurekendanna úr fjölmiðlum þann 1. nóvember sl. um að vilji þeirra hafi ávallt staðið til þess að standa skil á sínu gagnvart skjólstæðingum MATVÍS er því ekki trúverðug þar sem ágreiningurinn nú snýst einmitt um það að ekki hefur verið gert upp við skjólstæðinga okkar að fullu.“
