Vesturlönd, með Bandaríkin og ESB í fararbroddi, hafa beitt Rússa hörðum refsiaðgerðum vegna innrásar þeirra í Úkraínu. Þess utan hefur stríðsgæfa Rússa snúist við á síðustu mánuðum og þeir hafa beðið marga ósigra á vígvellinum.
Rússar horfa nú inn í nýtt ár þar sem fyrirsjáanlegt er að refsiaðgerðirnar muni lama stóran hluta af efnahagslífi landsins. Þær muni koma sérstaklega illa við einn þjóðfélagshóp að mati Jan Ludvig Andreasson, aðalhagfræðings hjá Eika Gruppen í Noregi. Í samtali við Dagbladet sagðist hann telja að spá OECD um 5,6% efnahagssamdrátt í Rússlandi á næsta ári segi ekki alla söguna, það séu aðrir þættir sem séu líka hættulegir.
Ef samsetning þjóðarinnar sé skoðuð sjáist að það séu um sjö milljónir karla á aldrinum 20 til 30 ára í landinu. Mörg hundruð þúsund þeirra muni særast, verða fyrir áfalli eða falla í stríðinu.
Hann sagði að þrátt fyrir að Rússar séu yfirleitt harðir af sér og vanir mótlæti en það sé samt sem áður mjög mikilvægt fyrir Pútín að unga fólkið taki ekki afstöðu gegn stríðinu. Hann sagði að unga fólkið geti haldið ýmsar efnahagsþrengingar út en það haldi ekki út að missa stóran hluta af æsku sinni, það vilji það ekki. „Skynsamt fólk hverfur úr háskólunum. Allt samfélagið á á hættu að bíða skaða af og það hefur sennilega gerst nú þegar,“ sagði hann.
