Vladimir Pútín, forseti Rússlands, hyggst leggja fram lagabreytingu sem heimilar stjórnvöldum að svipta einstaklinga, sem ekki eru fæddir í Rússlandi, ríkisfangi sínu og vegabréfum, ef að viðkomandi gagnrýnir stríðsrekstur stjórnvalda í Úkraínu.

Lagabreytingunni er beint að Úkraínumönnum á hermnumdum svæðum sem að neyddir voru til að gerast rússneskir ríkisborgarar.

Samkvæmt fréttum erlendra miðla getur ýmislegt orðið til þess að fólk verði svipt ríkisfangi sínu og réttindum, meðal annars að dreifa falsfréttum um Rússland, vanvirða rússneska þjóðfánann, þátttaka í skipulögðu starfi eða samtökum sem falla ekki rússneskum stjórnvöldum í geð, ákall um að hernumdu landssvæðin kljúfi sig frá Rússlandi og hverskonar öfgahyggja.

Reikna má með að hin umdeilda lagabreyting séu viðbrögð Vladimir Pútín við niðurlægjandi flótta rússneska hersins frá úkraínsku borginni Kherson.

Evrópusambandið hefur gefið það út að vegabréf, sem gefin hafa verið út af Rússum til íbúa hernuminna svæða í Úkraínu, muni ekki gilda til ferðalaga innan Schengen-svæðisins. Sú ákvörðun hefur ekki verið staðfest af Evrópuþinginu en búist er við að það verði fyrr en síðar.

Þá var greint frá því að Pútín ætlaði ekki að mæta til leiks á fund G20 ríkjanna í Balí en þar hefði hann hitt Joe Biden, Bandaríkjaforseta, í fyrsta sinn síðan stríðsbröltið í Úkraínu hófst. Þess í stað mun utanríkisráðherrann Sergei Lavrov mæta fyrir hönd Rússa ásamt sendinefnd sinni.