Í tveimur nýjum úrskurðum siðanefndar BÍ er komist að þeirri niðurstöðu að Reynir Traustason, ritstjóri Mannlífs, hafi brotið mjög alvarlega gegn siðareglum Blaðamannafélags Íslands. Snertir þetta umfjöllun sem tengist málefnum athafnamannsins Halldórs Kristmannssonar, en Reynir hefur þegið greiðslur fyrir bókaskrif frá Halldóri og telst því vanhæfur til að fjalla um mál sem tengjast fjárhagslegum deilum Halldórs.

Blaðamannafélag Íslands birtir stutta samantekt um úrskurðina ásamt tenglum í úrskurðina sjálfa og þar segir meðal annars að eftir uppkvaðningu eldri úrskurða sama efnis hafi Reynir haldið áfram að birta efni í sama dúr en birt svokallaðan „fyrirvara“ á eftir greinunum. Hafi þær greinar verði sama marki brenndar og fyrir greinar sama efnis og séu brot gegn siðareglum.

Ennfremur segir:

„Í umfjöllun siðanefndar um mál nr. 8 er vísað til úrskurða nefndarinnar í málum nr. 8/2021-2022 og nr. 9/2021-2022, sem kveðnir voru upp 31. maí 2022, en þar komst siðanefnd að þeirri niðurstöðu að „með móttöku fjármuna frá Halldóri Kristmannssyni, vegna bókarskrifa um kæranda, hafi kærði orðið vanhæfur til að fjalla um málefni kæranda í fréttamiðli með þeim hætti sem hin kærða umfjöllun var sett fram enda hafi honum borið skv. 5. gr. siðareglna að varast slíka hagsmunaárekstra.“ 

Þar segir einnig: „Kæruatriði 1-22 varða umfjöllun í miðlinum frá 4. mars 2022 til 17. maí 2022 en fyrrgreindir úrskurðir Siðanefndar voru upp kveðnir eftir þann tíma eða 31. maí 2022. Siðanefnd telur þær greinar, sem merktar eru kærða, vera alvarlegt brot á siðareglum með sama hætti og í fyrri úrskurðum. Greinar nr. 23-27, frá 3. júní 2022 til 27. júlí 2022, sem merktar eru kærða, eru hins vegar birtar eftir uppkvaðningu úrskurðanna og eru því ítrekun á brotum gegn siðareglum. Siðanefnd telur að skrif og birting kærða á þeim greinum vera mjög alvarlegt brot á siðareglum.“