Fólk sem flúði frá Úkraínu í kjölfar innrásar Rússa í landið ætti að halda sig fjarri Úkraínu í vetur. Þetta sagði Iryna Vereshchuk, varaforsætisráðherra Úkraínu, í gær og vísaði til þess að Rússar hafi valdið svo miklu tjóni á orkuinnviðum landsins að rafmagn og hiti séu af skornum skammti.

Hún hvatti fólk til að halda sig erlendis fram á vor. „Ég vil biðja þá (flóttamenn, innsk. blaðamanns) um að koma ekki heim. Við verðum að komast í gegnum veturinn“, sagði hún í sjónvarpsviðtali að sögn Sky News.

Stjórnvöld í Kyiv segja að Rússar hafi skemmt allt að 40% raforkukerfisins með flugskeytaárásum að undanförnu. Hafa landsmenn verið varaðir við rafmagnsleysi í daga eða vikur vegna þess.