Kona sem missti stjórn á sér í verslun árið 2018 hefur stefnt ríkinu vegna meintrar ólöglegrar handtöku og fleiri lögregluaðgerða gegn sér. Dómur var kveðinn upp í miskabótamáli konunnar gegn ríkinu þann 12. október síðastliðinn.
Aðdragandi málsins er sá að konan var stödd í verslun þegar henni sinnaðist við afgreiðslustúlku í versluninni. Á leiðinni út tók hún blómvönd sem var til sölu í versluninni og fleygði í ruslafötu. Í stefnu hennar í málinu er greint frá því að hún iðrist þessara gjörða sinna. Starfsmaður í versluninni kallaði til lögreglu með því að ýta á svokallaðan árásarhnapp. Konan ók bíl sínum af bílastæði verslunarinnar en stöðvaði hann skömmu síðar út í vegarkanti. Þar bar lögreglu að og grunaði konuna um akstur undir áhrifum fíkniefna. Var hún því handtekin og flutt á lögreglustöð. Þar var henni gert að skila þvagprufu og tekið var blóðsýni úr henni.
Konan byggir mál sitt á því að þessar þvingunaraðgerðir lögreglu hafi verið ólöglegar og leiði til bótaskyldu ríkisins gegn henni. Ríkið hafnar kröfunni og byggir meðal annars á því að lyf sem mældist í blóði konunnar hafi haft áhrif á aksturshæfni hennar og hún hafi ekki verið í ástandi til að aka bíl. Legið hafi fyrir rökstuddur grunur um að konan væri undir áhrifum lyfja.
Konan krafðist 1,8 milljóna króna í bætur. Héraðsdómur varð ekki við kröfum konunnar og sýknaði ríkið í málinu. Málskostnaður greiðist hins vegar úr ríkissjóði en konan naut gjafsóknar.
