Vél frá flugfélaginu Play flaug í morgun í fyrsta sinn til Liverpool frá Keflavíkurflugvelli. Félagið hyggst halda úti tveim flugum til Bítlaborgarinnar á viku í vetur og fram á vor. Farþegar á leið til Liverpool í morgun nutu léttra veitinga við hliðið og ljúfra tóna Bítlanna.

Í vélinni tóku þá á móti farþegunum flugliðar íklæddir Liverpool treyjum. Strax í upphafi flugs var þó ljóst að meira fór fyrir Everton áhugamönnum um borð en „púlurum.“ Everton menn virtust þó, að sögn viðstaddra, ekki taka klæðaburði flugliðanna nærri sér.

Frá miðborg Liverpool er um klukkustundarakstur að Old Trafford, heimavelli Manchester United og annað eins að Etihad leikvelli Manchester City. Um tíu mínútur tekur að aka frá miðborginni að völlum heimamannanna í Everton og Liverpool. Loks ættu Leedsmenn á Íslandi að fagna auknu framboði á flugum til Liverpool/Manchester svæðisins, því aðeins tekur um eina og hálfa klukkustund að aka frá Liverpool til Leeds.

Að vanda tóku dælubílar slökkviliðs John Lennon flugvallar á móti þessu jómfrúarflugi Play með hátíðarbrag, líkt og sjá má á meðfylgjandi myndum. Þá mátti sjá þó nokkurn fjölda erlendra blaðamanna við hlið Play á Lennon flugvelli og ljóst að áhugi á þessari nýju tengingu til Íslands er mikill.