Um klukkan 18 í gær var maður kýldur í andlitið og laminn í höfuðið með síma í Miðborginni. Árásarmaðurinn var farinn af vettvangi er lögreglan kom. Árásarþolinn var fluttur með sjúkrabifreið á Bráðadeild. Þar voru sex spor saumuð í höfuð hans.

Á Reykjanesbraut, nærri Straumsvík, var bifreið ekið á ljósastaur klukkan 03.45 í nótt. Einn var í bifreiðinni en ekki liggja fyrir upplýsingar um meiðsli hans að svo stöddu. Bifreiðin var flutt af vettvangi með dráttarbifreið.

Í Miðborginni var maður í annarlegu ástandi handtekinn á tólfta tímanum. Lögreglan var ítrekað búin að hafa afskipti af honum um kvöldið. Hann var handtekinn og vistaður í fangageymslu.

Á þriðja tímanum var maður í annarlegu ástandi handtekinn í Laugarneshverfi. Áður hafði verið tilkynnt að hann væri að ógna fólki. Hann var vistaður í fangageymslu.

Klukkan hálf fjögur var tilkynnt um mann liggjandi á gangstétt í Hlíðahverfi. Hann mun hafa fokið í óveðrinu og kvartaði um verk í annarri höndinni. Hann var fluttur á Bráðadeild með sjúkrabifreið.