Í dag var kveðinn upp í Héraðsdómi Reykjavíkur dómur í sérstæðu fasteignaviðskiptamáli. Kona og maður kröfðust þess að maður, eigandi íbúðar við Reynimel í Reykjavík, afhenti þeim íbúðina, gegn greiðslu upp á 82 milljónir króna.
Fólkið hafði gert tilboð íbúðina og því hafði svarað með gagntilboði eigandans sem þau samþykktu.
Tilboðið var með þeim fyrirvara að eigandanum tækist að ganga frá kaupum á fasteign á Reykjavíkurvegi og að Ríkisskattstjóri aflétti veðböndum á eigninni vegna skuldar. Ekki tókst að ganga frá kaupum á fasteigninni á Reykjavíkurvegi né aflétta veðböndum frá skattinum og afturkallaði eigandinn þá gagntilboð sitt. Á þetta féllust ekki hinir væntanlegu kaupendur. Þau töldu sig hafa veitt nægilega langan frest til að uppfylla þessi skilyrði og þegar ekki var fallist á að gera afsal og afhenda íbúðina stefndu þau eigendanum fyrir dóm, á þeim forsendum að hið samþykkta kauptilboð hefði verið bindandi.
Það var niðurstaða héraðsdóms að kauptilboðið væri ekki bindandi vegna fyrirvaranna. Í niðurstöðunni segir meðal annars:
„Þegar öll skilyrði eru uppfyllt er gengið til kaupsamningsgerðar og samningurinn um kaupin endanlega útfærður og honum í framhaldi þinglýst. Þegar skilyrði kaupsamnings eru uppfyllt, þ.e. afhending og greiðslur, er gengið frá afsali. Eins og rakið er að framan var það skilyrði stefnda að kauptilboð hans í aðra fasteign í sama íbúðarhverfi yrði að kaupsamningi aldrei uppfyllt.“
Var eigandinn sýkn af kröfum fólksins en dómurinn ákvað samt að hvor aðili myndi bera sinn málskostnað.
