Eins og fram kom á blaðamannafundi lögreglunnar í dag hefur Sigríður Björk Guðjónsdóttir ríkislögreglustjóri sagt sig frá rannsókn viðamikils máls sem varðar meint stórfelld brot á vopnalögum og grun um áform um hryðjuverk. Ríkislögreglustjóri segir sig frá málinu þar sem ættingi hennar tengist rannsókninni.
Fram kemur á Stundinni í dag að þessi ættingi Sigríðar Bjarkar er faðir hennar, Guðjón Valdimarsson. Guðjón er fæddur árið 1953 og rekur hann fyrirtækið Vopnasalinn. Fyrirtækið selur skotvopn í gegnum netið. Guðjón mun vera stórtækur skotvopnasafnari.
Ekkert liggur fyrir um að þessi starfsemi sé ekki lögum samkvæmt og engar upplýsingar liggja fyrir um með hvaða hætti Guðjón tengist rannsókninni.
DV hefur árangurslaust reynt að ná sambandi við Guðjón Valdimarsson í dag.
Samkvæmt RÚV var gerð húsleit hjá Guðjóni í gær. Hann er sagður eiga gífurlega stórt byssusafn og hafi svokallað safnaleyfi sem geri honum kleift að eiga vopn sem annars eru ólögleg hér á landi.
Hugsanleg tengsl Guðjóns við málið liggja ekki fyrir og vill lögregla ekki gefa upplýsingar um þau.
