Liðlega tvö kíló af amfetamíni og kókaíni fundust falin í ferðatöskum mæðgina er komu til Seyðisfjarðar með Norrænu að morgni þriðjudagsins 13. september síðastliðinn. Þetta kemur fram í tilkynningu frá lögreglu.

Samkvæmt lögreglunni er móðirin á fertugsaldri og sonur hennar á sextánda aldursári. Bæði móðirinn og sonur hennar voru úrskurðuð í gæsluvarðhald til föstudagsins 23. september. Sökum ungs aldurs er sonurinn vistaður á stofnun sem ætluð er fyrir ungmenni á meðan gæsluvarðhald varir, hann gistir því ekki í fangageymslu eins og móðir sín.

Rannsókn málsins, sem unnið var í samstarfi lögreglu og tollgæslu, miðar vel. Vegna rannsóknarhagsmuna getur lögregla ekki gefið frekari upplýsingar að svo stöddu.