Sigmundur Ernir Rúnarsson, ritstjóri Fréttablaðsins, er harðorður í leiðara helgarblaðsins þar sem hann gagnrýnir „gegndarlausa álagningu Fríhafnarinnar í Leifsstöð“ og þar með fari sjálft ríkisvaldið á undan „með vondu fordæmi og okri svo á landsmönnum í opinberum verslunum að líkja verður við argasta arðrán.“
Sigmundur bendir á að nýleg verðkönnun leiði í ljós að íslenska ríkið leggur mun meira á vörur sínar í Fríhöfninni en lagt er á vörur sem fást í lágvöruverðsverslunum á höfuðborgarsvæðinu „enda þótt hún þurfi ekki að standa skil á 24,5 prósenta virðisaukaskatti sem einkareknar verslanir fá ekki umflúið. Þetta er svívirða. Og heitir ekki annað en skattsvik,“ segir hann.
Þannig sé íslenska ríkið hreinlega að stela niðurfellingu álaganna af almenningi og stingi í eigin vasa.
„Auðvitað er það rétt hjá formanni Neytendasamtakanna sem sagði í fréttaflutningi af málinu að þessi gífurlega álagning af hálfu hins opinbera væri algerlega út úr korti. Og er nema von að maðurinn segi það. Dæmi eru um vinsælar sælgætisvörur sem eru fimmtíu prósentum dýrari í Leifsstöð en í Bónus, Krónunni eða Costco í bænum,“ segir Sigmundur og heldur áfram;
„Álagningin er því í rauninni jafnt yfirgengileg og hún er ófyrirleitin. Og enn ein gildran sem neytendur á Íslandi þurfa að gæta sín á að falla ekki ofan í, eins og formaður Neytendasamtakanna benti enn fremur á í umræddri frétt.“
Hér má nálgast leiðarann í heild sinni, en hann ber yfirskriftina: Ríkisokur.
